واشنگٹن(وے آوٹ نیوز) ویمن چیمبر آف کامرس اینڈ انڈسٹری (IWCCI) کی بانی صدر ثمینہ فاضل نے امریکہ کے دورے کے دوران ترک-امریکن چیمبر آف کامرس کے ساتھ ایک مفاہمتی یادداشت (MoU) پر دستخط کیے۔ اس معاہدے کا مقصد پاکستانی خواتین کاروباریوں کو بین الاقوامی منڈیوں تک رسائی فراہم کرنا اور اقتصادی شراکت داری کو فروغ دینا ہے۔
ثمینہ فاضل نے کہا کہ IWCCI کا ہدف خواتین کی کاروباری صلاحیتوں کو فروغ دینا اور انہیں عالمی سطح پر مواقع فراہم کرنا ہے تاکہ وہ اپنی مصنوعات اور خدمات بین الاقوامی سطح پر متعارف کرا سکیں۔ انہوں نے مزید کہا کہ پاکستان اور ترکی کے درمیان گہرے اور دیرینہ تعلقات قائم ہیں، جو باہمی احترام، ثقافتی تنوع، اور امن و ترقی کے عزم پر مبنی ہیں۔
ترک-امریکن چیمبر آف کامرس کے صدر ڈاکٹر علی کوچاک نے اس موقع پر کہا کہ ان کا ادارہ امریکی مارکیٹ میں قدم جمانے کی خواہش رکھنے والی پاکستانی خواتین کی بھرپور مدد کرے گا۔ انہوں نے کہا کہ پاکستانی مصنوعات اپنے معیار اور قیمت کے باعث امریکی منڈی میں جگہ بنا سکتی ہیں۔
یہ معاہدہ مشترکہ تجارتی نمائشوں، وفود کے تبادلوں، نیٹ ورکنگ فورمز، اور معلوماتی تبادلے کے پروگراموں کی راہ ہموار کرے گا، جو ٹیکسٹائل، ہینڈی کرافٹ، آئی ٹی، اور سروسز سمیت مختلف شعبوں میں پاکستانی کاروباری خواتین کے لیے مفید ثابت ہوں گے۔ ثمینہ فاضل نے کہا کہ IWCCI خواتین کی عالمی ساکھ کو بہتر بنانے، سرمایہ کاری کے فروغ، اور خواتین کی صلاحیتوں اور ہنر کو دنیا کے سامنے لانے کے لیے سرگرم ہے۔ انہوں نے کہا کہ ہم ایک ایسا پائیدار اور جامع تجارتی ڈھانچہ قائم کرنا چاہتے ہیں جو پاکستان، ترکی، اور امریکہ کو باہم منسلک کرے۔
