اسلام آباد: اسلامی نظریاتی کونسل (سی آئی آئی) نے بینکنگ ٹرانزیکشنز پر عائد ودہولڈنگ ٹیکس کو شریعت کے خلاف قرار دیا ہے۔
بدھ کو جاری کردہ اعلامیے میں کونسل نے اس عمل کو ’’استحصالی‘‘ قرار دیا۔ اجلاس کی صدارت چیئرمین کونسل مولانا محمد راغب حسین نعیمی نے کی۔
کونسل نے دیت قانون میں مجوزہ ترمیم کو بھی مسترد کر دیا جس میں سونا، چاندی اور اونٹ کو خون بہا کے معیار سے نکالنے کی تجویز دی گئی تھی۔ سی آئی آئی نے کہا کہ شریعت کے مطابق موجودہ طریقہ کار کو برقرار رکھا جانا چاہیے۔
مزید برآں، کونسل نے انسولین میں خنزیر کے اجزاء کے بجائے حلال متبادل استعمال کرنے پر زور دیا۔ انسانی دودھ کے ذخائر قائم کرنے کی بھی مشروط اجازت دی گئی، تاہم اس کے لیے پہلے لازمی قانون سازی کی سفارش کی گئی تاکہ غلط استعمال سے بچاؤ ہو سکے۔
دوسری جانب، فیڈرل بورڈ آف ریونیو (ایف بی آر) نے اعلان کیا ہے کہ وہ ودہولڈنگ ٹیکس سے متعلق فیصلے کو سپریم کورٹ میں چیلنج کرے گا۔
