اسلام آباد (ایم این این) 20 اپریل: متحدہ قومی موومنٹ اور آل پاکستان مسلم لیگ کے رہنماؤں نے ملک میں امن کے قیام کی کوششوں پر وزیر اعظم شہباز شریف اور آرمی چیف جنرل عاصم منیر کو خراج تحسین پیش کیا۔
ایم کیو ایم کے مرکزی رہنما زاہد ملک کی آل پاکستان مسلم لیگ کے چیف آرگنائزر ڈاکٹر محمد امجد اور مرکزی جوائنٹ سیکرٹری عاطف محمود مغل سے ملاقات ہوئی، جس میں ملک کی مجموعی سیاسی صورتحال پر تبادلہ خیال کیا گیا۔
دونوں رہنماؤں نے پوٹھوہار صوبہ کے قیام کے لیے مشترکہ کوششیں کرنے پر اتفاق کیا اور کہا کہ خطہ پوٹھوہار کے عوام طویل عرصے سے اپنے جائز حقوق سے محروم ہیں۔
گفتگو کے دوران اس بات پر بھی زور دیا گیا کہ ترقی، تعلیم، صحت اور روزگار کے مواقع میں دیہی اور شہری علاقوں کے درمیان موجود فرق کو ختم کیا جانا چاہیے۔
ڈاکٹر محمد امجد نے زاہد ملک کی آمد پر ان کا شکریہ ادا کرتے ہوئے ایم کیو ایم کی قیادت کے لیے نیک تمناؤں کا اظہار کیا، جبکہ زاہد ملک نے ڈاکٹر امجد کی ملک و قوم کے لیے مخلصانہ کاوشوں کو سراہا۔
