میامی (ایم این این): سابق عالمی ہیوی ویٹ چیمپئن انتھونی جوشوا نے نیٹ فلکس کے زیر اہتمام میامی میں ہونے والے متنازع مقابلے میں یوٹیوبر سے باکسر بننے والے جیک پال کو ناک آؤٹ کر دیا۔
دو مرتبہ کے عالمی چیمپئن جوشوا کو کم تجربہ رکھنے والے جیک پال کے خلاف توقع سے زیادہ محنت کرنا پڑی، تاہم مقابلے کے آخری حصے میں ان کی جسامت، طاقت اور تجربہ فیصلہ کن ثابت ہوا۔
کیسیا سینٹر میں ہونے والا یہ مقابلہ، جس میں دونوں فائٹرز کے درمیان مبینہ طور پر 184 ملین ڈالر کی خطیر رقم تقسیم ہوئی، معیار کے لحاظ سے کمزور قرار دیا گیا۔ کئی مواقع پر جیک پال بار بار زمین پر گرتا اور جوشوا کی ٹانگوں کو پکڑنے کی کوشش کرتا رہا، جس پر ریفری کرسٹوفر ینگ نے چوتھے راؤنڈ میں دونوں فائٹرز کو تنبیہ بھی کی۔
جیسے جیسے جیک پال تھکن کا شکار ہوا، جوشوا نے زیادہ مؤثر انداز میں پنچ لگانا شروع کیے۔ پانچویں راؤنڈ میں دو مرتبہ گرائے جانے کے بعد چھٹے راؤنڈ میں مقابلہ ختم ہو گیا، جب جوشوا نے کونے میں پھنسا کر پہلے زوردار لیفٹ اور پھر رائٹ پنچ کے ذریعے جیک پال کو ناک آؤٹ کر دیا۔
مقابلے کے بعد انتھونی جوشوا نے اعتراف کیا کہ ان کی کارکردگی بہترین نہیں تھی، تاہم انہوں نے جیک پال کی ہمت اور مزاحمت کی تعریف کی۔
دوسری جانب جیک پال نے کہا کہ انہیں شبہ ہے کہ ان کا جبڑا ٹوٹ گیا ہے، مگر وہ اپنی کارکردگی سے مطمئن ہیں اور انہوں نے مستقبل میں واپسی اور عالمی اعزاز جیتنے کے عزم کا اظہار کیا۔
یہ مقابلہ نیٹ فلکس کے تقریباً 300 ملین صارفین کو براہ راست دکھایا گیا۔ اگرچہ فائٹرز کے درمیان تجربے اور جسامت کے فرق پر پہلے ہی خدشات موجود تھے، تاہم مقابلہ توقع سے زیادہ دیر تک جاری رہا، جس میں جوشوا واضح طور پر برتری رکھتے دکھائی دیے۔
