کابل (ایم این این): وسطی کابل کے علاقے شہرِ نو میں پیر کو ہونے والے ایک دھماکے میں کم از کم سات افراد ہلاک اور متعدد زخمی ہو گئے۔ یہ بات اطالوی فلاحی ادارے ایمرجنسی نے بتائی، جو افغان دارالحکومت میں ایک اسپتال چلاتا ہے۔
ایمرجنسی کے مطابق دھماکے کے بعد 20 افراد کو اس کے سرجیکل سینٹر منتقل کیا گیا، جن میں سے سات افراد اسپتال پہنچنے سے پہلے ہی دم توڑ چکے تھے۔ دھماکہ شہرِ نو کے علاقے میں اسپتال کے قریب پیش آیا۔
کابل پولیس کے ترجمان خالد زدران نے بتایا کہ دھماکہ گل فروشئی اسٹریٹ پر واقع ایک ہوٹل کے اندر ہوا، تاہم دھماکے کی نوعیت اور وجوہات سے متعلق کوئی تفصیلات فراہم نہیں کی گئیں۔
چین کی سرکاری خبر رساں ایجنسی شنہوا نے ایک ہوٹل ملازم کے حوالے سے بتایا کہ واقعے میں دو چینی شہری شدید زخمی ہوئے، جبکہ ایک افغان سکیورٹی گارڈ بھی ہلاک ہوا۔
وزارت داخلہ کے ترجمان عبدالمتین قانی نے کہا کہ ابتدائی اطلاعات کے مطابق متعدد افراد جاں بحق اور زخمی ہوئے ہیں، جبکہ واقعے کی تحقیقات جاری ہیں۔
شہرِ نو کابل کا ایک حساس اور محفوظ علاقہ سمجھا جاتا ہے، جہاں غیر ملکیوں کی رہائش، بڑے دفاتر، شاپنگ کمپلیکس اور سفارت خانے موجود ہیں۔
تاحال کسی گروہ نے دھماکے کی ذمہ داری قبول نہیں کی۔ 2021 میں طالبان کے اقتدار سنبھالنے کے بعد اگرچہ سکیورٹی کی یقین دہانیاں کرائی گئی تھیں، تاہم حملے اب بھی جاری ہیں، جن میں سے کئی کی ذمہ داری داعش کی مقامی شاخ قبول کرتی رہی ہے۔
