ٹک ٹاک نے سال 2025 کی دوسری سہ ماہی (اپریل تا جون) کے لیے کمیونٹی گائیڈلائنز انفورسمنٹ رپورٹ جاری کر دی ہے، جو صارفین کے لیے محفوظ اور مثبت ڈیجیٹل ماحول کو یقینی بنانے کے پلیٹ فارم کے عزم کی عکاسی کرتی ہے۔ یہ رپورٹ ان فعال اقدامات کی تفصیل پیش کرتی ہے جو ٹک ٹاک نے اپنی کمیونٹی گائیڈلائنز کی خلاف ورزی کرنے والے مواد کو شناخت اور ہٹانے کے لیے کیے۔
رپورٹ کے مطابق، اس عرصے کے دوران پاکستان میں کمیونٹی گائیڈلائنز کی خلاف ورزی پر 25,448,992 ویڈیوز حذف کی گئیں۔ فعال انداز میں کانٹینٹ ہٹانے کی شرح 99.7 فیصد رہی، جبکہ 96.2 فیصد ویڈیوز کو اپ لوڈ کیے جانے کے 24 گھنٹوں کے اندر ہٹا دیا گیا۔
عالمی سطح پر، ٹک ٹاک نے مجموعی طور پر 189 ملین ویڈیوز حذف کیں، جو پلیٹ فارم پر اپ لوڈ کیے گئے کل مواد کا تقریباً 0.7 فیصد بنتا ہے۔ ان میں سے 163,962,241 ویڈیوز خودکار ٹیکنالوجیز کی مدد سے ہٹائی گئیں، جبکہ 7,457,309 ویڈیوز جائزے کے بعد دوبارہ بحال کر دی گئیں۔ عالمی سطح پر فعال ہٹانے کی شرح 99.1 فیصد رہی اور 94.4 فیصد مواد 24 گھنٹوں کے اندر ڈیلیٹ کیا گیا۔
پلیٹ فارم کی ساکھ برقرار رکھنے کے لیے، اس سہ ماہی کے دوران 76,991,660 جعلی اکاؤنٹس ہٹائے گئے، جبکہ 25,904,708 ایسے اکاؤنٹس بھی حذف کیے گئے جن کے بارے میں شبہ تھا کہ وہ 13 سال سے کم عمر صارفین کے تھے۔
رپورٹ کے مطابق، حذف کی گئی ویڈیوز کا 30.6 فیصد حصہ حساس یا بالغ مواد پر مشتمل تھا، 14 فیصد نے حفاظتی اور شائستگی کے اصولوں کی خلاف ورزی کی، 6.1 فیصد رازداری اور سیکیورٹی سے متعلق پالیسیوں کے منافی تھا، 45 فیصد کو غلط معلومات اور 23.8 فیصد کو ایڈیٹ شدہ یا مصنوعی ذہانت سے تیار کردہ مواد کے طور پر رپورٹ کیا گیا۔
کمیونٹی گائیڈلائنز انفورسمنٹ رپورٹ کا باقاعدہ اجرا ٹک ٹاک کے شفافیت کے عزم اور پلیٹ فارم پر نافذ کی جانے والی کارروائیوں کو اجاگر کرتا ہے۔
مزید معلومات اور 2025 کی پہلی سہ ماہی کی مکمل رپورٹ دیکھنے کے لیے ٹک ٹاک کے ٹرانسپیرنسی سینٹر کا دورہ کریں، جو اردو اور انگریزی دونوں زبانوں میں دستیاب ہے۔
