واشنگٹن — وزیراعظم شہباز شریف اور سابق امریکی صدر ڈونلڈ ٹرمپ کے درمیان 25 ستمبر کو واشنگٹن میں اہم ملاقات متوقع ہے، جو اقوامِ متحدہ کی جنرل اسمبلی کے اجلاس کے موقع پر ہوگی۔
سفارتی ذرائع کے مطابق یہ ملاقات سعودی عرب اور قطر سے وسیع مشاورت کے بعد ترتیب دی گئی ہے، خاص طور پر قطر پر اسرائیلی حملے کے تناظر میں۔ وزیراعظم شہباز شریف امریکا روانگی سے قبل ریاض میں سعودی ولی عہد محمد بن سلمان سے اور لندن میں برطانوی وزیراعظم سے الگ الگ ملاقاتیں کریں گے۔ اس کے بعد وہ چیف آف آرمی اسٹاف فیلڈ مارشل سید عاصم منیر سمیت اعلیٰ وفد کے ہمراہ نیویارک پہنچیں گے۔
واشنگٹن میں ہونے والی ٹرمپ-شہباز ملاقات میں مشرقِ وسطیٰ کی صورتحال، پاکستان میں حالیہ تباہ کن سیلاب اور خطے کے دیگر اہم مسائل زیر بحث آنے کی توقع ہے۔ اسلام آباد میں موجود ذرائع کے مطابق ریاض اور دوحہ دونوں ہی اس ملاقات کے حامی ہیں، تاہم پاکستان کا یو این مشن اور واشنگٹن میں سفارت خانہ تاحال اس حوالے سے باضابطہ تصدیق سے گریز کر رہا ہے۔
اب کے بار منظرنامہ مختلف ہے — معاملہ صرف پاکستان کے داخلی مسائل کا نہیں بلکہ مسلم ممالک کے تحفظ اور مشرقِ وسطیٰ میں بڑھتے ہوئے تنازعے کا ہے۔ دلچسپ امر یہ ہے کہ حالیہ دنوں میں واشنگٹن نے ایک بار پھر پاکستان کو “مضبوط اتحادی” قرار دینا شروع کر دیا ہے، جو دو طرفہ تعلقات میں ایک نئے بیانیے کا اشارہ ہے۔
