اسلام آباد—انٹرنیشنل کرکٹ کونسل (آئی سی سی) نے پاکستان کرکٹ بورڈ (پی سی بی) کی شکایت کو مسترد کردیا ہے جس میں ایشیا کپ کے دوران پاک-بھارت میچ میں پیش آنے والے تنازعے پر میچ ریفری اینڈی پائی کرافٹ کو ہٹانے کا مطالبہ کیا گیا تھا۔ یہ دعویٰ بھارتی میڈیا کی جانب سے منگل کو سامنے آیا۔
پی سی بی نے ایک روز قبل آئی سی سی کو باضابطہ شکایت درج کرائی تھی جس میں الزام لگایا گیا تھا کہ پائی کرافٹ نے دونوں کپتانوں کو ٹاس کے وقت ہاتھ ملانے سے منع کیا، جو کھیل کی روح کے خلاف ہے۔ پی سی بی چیئرمین محسن نقوی نے کہا تھا کہ ریفری نے “آئی سی سی کوڈ آف کنڈکٹ اور ایم سی سی کے قوانین” کی خلاف ورزی کی ہے۔
بھارتی خبر رساں ادارے پریس ٹرسٹ آف انڈیا کے مطابق آئی سی سی نے رات گئے پی سی بی کو آگاہ کیا کہ پائی کرافٹ کو ہٹایا نہیں جائے گا اور شکایت ناقابلِ قبول قرار دی گئی ہے۔ تاہم، کرک بز نے رپورٹ کیا کہ پی سی بی نے ایسی کسی اطلاع کے ملنے کی تردید کی ہے۔ بورڈ نے اس پر تاحال کوئی باضابطہ بیان جاری نہیں کیا۔
ٹائمز آف انڈیا نے دعویٰ کیا کہ دراصل یہ ایشین کرکٹ کونسل (اے سی سی) کے گراؤنڈ پر موجود حکام تھے جنہوں نے ٹاس پر ہاتھ نہ ملانے کی ہدایت دی، اور یہ واضح نہیں کہ ایسی کوئی باضابطہ پالیسی موجود بھی تھی یا نہیں۔
اتوار کو دبئی میں ہونے والے پاک-بھارت میچ میں بھارتی ٹیم نے پاکستان کو سات وکٹوں سے شکست دی۔ میچ کے بعد بھارتی کپتان سوریہ کمار یادیو نے فتح کو مقبوضہ کشمیر کے پاہلگام حملے اور مئی میں ہونے والی پاک-بھارت جھڑپ سے جوڑتے ہوئے اسے بھارتی افواج کے نام کیا۔ ان کے اس سیاسی بیان پر پاکستان کے کھلاڑیوں اور ماہرین نے سخت تنقید کی۔
پاکستانی کپتان سلمان علی آغا احتجاجاً پریس کانفرنس میں شریک نہ ہوئے جبکہ کوچ مائیک ہیسن نے بھارتی ٹیم کے رویے کو “مایوس کن” قرار دیا۔
