اسلام آباد، برٹش کونسل نے اسٹڈی یوکے ایلومنائی ایوارڈز کے بارہویں ایڈیشن کا اعلان کرتے ہوئے یوکے سے تعلیم حاصل کرنے والے فارغ التحصیل طلبہ کو درخواستیں جمع کرانے کی دعوت دی ہے۔ درخواست جمع کرانے کی آخری تاریخ 16 اکتوبر 2025 مقرر کی گئی ہے۔
یہ ایوارڈز اُن بین الاقوامی فارغ التحصیل طلبہ کو اعزاز دیتے ہیں جنہوں نے برطانیہ میں حاصل کردہ علم، مہارت اور اقدار کو اپنی کمیونٹی، ملک اور شعبے کی ترقی میں استعمال کیا۔
ایوارڈز چار زمروں میں دیے جائیں گے: سائنس اور پائیداری، ثقافت، تخلیقی صلاحیت اور کھیل، سماجی خدمت، اور بزنس و اختراع۔ امیدوار قومی اور عالمی سطح پر مقابلہ کریں گے۔ پاکستان کے فائنلسٹ جنوری 2026 میں اعلان کیے جائیں گے جبکہ قومی سطح کی تقریب فروری 2026 میں منعقد ہوگی۔ عالمی سطح پر 28 فائنلسٹس میں سے چار فاتحین اگست 2026 میں منتخب ہوں گے اور اُن کی کامیابیوں کو ڈیجیٹل مہم کے ذریعے اجاگر کیا جائے گا۔
عالمی سطح پر جیتنے والے ایلومنائی کو برطانیہ کا خصوصی نیٹ ورکنگ وزٹ کرنے کا موقع ملے گا، ساتھ ہی بین الاقوامی سطح پر پہچان اور کاروباری و پیشہ ورانہ نیٹ ورک بڑھانے کے مواقع بھی فراہم ہوں گے۔
برٹش کونسل پاکستان کی ڈپٹی ڈائریکٹر ماہرہ رحمان نے کہا کہ یہ ایوارڈز یوکے تعلیم کی طاقت اور اثرات کو نمایاں کرتے ہیں۔ انہوں نے کہا، ’’یہ صرف انفرادی کامیابیوں کا اعتراف نہیں بلکہ یوکے تعلیم کی تبدیلی لانے والی طاقت کا ثبوت ہیں۔ یہ ظاہر کرتے ہیں کہ یوکے میں حاصل کردہ علم اور اقدار کس طرح سرحدوں سے آگے جا کر صنعتوں کو نئی شکل دیتے ہیں، کمیونٹیز کو بااختیار بناتے ہیں اور دنیا میں مثبت تبدیلی کا باعث بنتے ہیں۔‘‘
گزشتہ سال 11ویں ایڈیشن میں تقریباً 100 ممالک سے 1300 سے زائد درخواستیں موصول ہوئیں۔ پاکستان کی قومی تقریب فروری 2025 میں کراچی میں منعقد ہوئی تھی جس میں مختلف شعبوں کے نمایاں ایلومنائی کو ایوارڈز دیے گئے۔
مزید معلومات اور درخواست جمع کرانے کے لیے برٹش کونسل کی ویب سائٹ پر رجوع کیا جا سکتا ہے:
https://www.britishcouncil.pk/study-uk/alumni-awards-2026
