لاہور – پنجاب پروونشل ڈیزاسٹر مینجمنٹ اتھارٹی (پی ڈی ایم اے) نے اعلان کیا ہے کہ مون سون بارشوں کا نواں سلسلہ شروع ہوگیا ہے جو 2 ستمبر تک جاری رہنے کا امکان ہے۔
پی ڈی ایم اے کے ترجمان کے مطابق بارشیں راولپنڈی، مری، گلیات، اٹک، چکوال، جہلم، گوجرانوالہ، لاہور، گجرات، سیالکوٹ، نارووال، حافظ آباد، منڈی بہاؤالدین، اوکاڑہ، ساہیوال، قصور، جھنگ، سرگودھا، میانوالی، ڈیرہ غازی خان، ملتان اور راجن پور میں متوقع ہیں۔
پنجاب ریلیف کمشنر نبیل جاوید نے ضلعی انتظامیہ اور صوبائی محکموں کو ہدایت کی ہے کہ وہ الرٹ رہیں اور ممکنہ نقصانات سے بچنے کے لیے پیشگی اقدامات کریں۔
یہ سلسلہ ایسے وقت میں شروع ہوا ہے جب پاکستان پہلے ہی اس سال کے شدید مون سون سے بری طرح متاثر ہے۔ جون کے آخر سے شروع ہونے والی موسلا دھار بارشوں اور سیلابوں نے ملک بھر میں بڑے پیمانے پر تباہی مچائی ہے، سیکڑوں افراد جاں بحق اور ہزاروں خاندان بے گھر ہوچکے ہیں جبکہ سڑکوں، پلوں اور صحت کی سہولیات سمیت اہم ڈھانچے کو بھی نقصان پہنچا ہے۔ حکام کو خدشہ ہے کہ نئی بارشیں نچلی اور سیلاب سے متاثرہ علاقوں میں صورتحال کو مزید سنگین بنا سکتی ہیں۔
پی ڈی ایم اے نے عوام سے اپیل کی ہے کہ احتیاطی تدابیر اختیار کریں، متاثرہ علاقوں میں غیر ضروری سفر سے گریز کریں اور کسی بھی ہنگامی صورتحال میں ریسکیو و ریلیف ٹیموں سے تعاون کریں۔
