اسلام آباد: اسلام آباد ٹریفک پولیس کے سینئر سپرنٹنڈنٹ، جو ایس ایس پی سیکیورٹی کے اضافی فرائض بھی انجام دے رہے تھے، کو ناقص نگرانی اور بدانتظامی پر دونوں عہدوں سے ہٹا دیا گیا۔ یہ کارروائی اس وقت ہوئی جب صدر آصف علی زرداری کا قافلہ وفاقی دارالحکومت میں مقررہ وی وی آئی پی روٹ سے ہٹ گیا۔
پولیس حکام کے مطابق ریٹائرڈ کیپٹن سید ذیشان حیدر، گریڈ 18 کے افسر، نے صدر اور ان کے قافلے کو سنگین سیکیورٹی خطرے میں ڈال دیا۔ جمعرات کی شام صدر زرداری، وفاقی وزیر داخلہ محسن نقوی اور دیگر کے ہمراہ ایوان صدر سے بحریہ ٹاؤن جا رہے تھے۔ قافلہ کورال چوک کراس کرنے کے بعد ایکسپریس وے پر آگے بڑھ گیا، حالانکہ سیکیورٹی انتظامات اور وی وی آئی پی روٹ پہلے سے طے تھا۔
قافلہ مقررہ موڑ لینے کے بجائے سیکیورٹی حصار سے باہر نکل گیا اور آدھے گھنٹے سے زائد ٹریفک میں پھنس گیا۔ اس واقعے پر وزارت داخلہ اور متعلقہ سیکیورٹی اداروں نے شدید تشویش کا اظہار کیا۔
بعدازاں، ذیشان حیدر کو دونوں عہدوں سے ہٹا کر سینٹرل پولیس آفس اسلام آباد رپورٹ کرنے کی ہدایت دی گئی۔ ریٹائرڈ اسکواڈرن لیڈر عبد الحق، گریڈ 19 افسر، کو ایس ایس پی سیکیورٹی کا اضافی چارج دیا گیا جبکہ گریڈ 18 افسر پری گل ترین کو ایس ایس پی ٹریفک پولیس کا اضافی چارج سونپا گیا۔
