برائن لارا کرکٹ اکیڈمی، تروبا میں کھیلے گئے تیسرے اور فیصلہ کن ون ڈے میچ میں ویسٹ انڈیز نے شاندار آل راؤنڈ کارکردگی دکھاتے ہوئے پاکستان کو 202 رنز کے بڑے مارجن سے شکست دے کر تین میچوں کی سیریز 1-2 سے اپنے نام کر لی۔ یہ 34 سال بعد پاکستان کے خلاف ویسٹ انڈیز کی پہلی ون ڈے سیریز فتح ہے۔
پاکستان نے ٹاس جیت کر پہلے فیلڈنگ کا فیصلہ کیا اور ابتدائی کامیابی بھی حاصل کی جب تیسرے اوور میں برینڈن کنگ صرف 10 رنز پر پویلین لوٹ گئے۔ تاہم، اوپنر ایون لیوس (37) اور کیسی کارٹی (17) نے دوسری وکٹ کے لیے 47 رنز جوڑ کر اننگز کو سہارا دیا، مگر دونوں جلد ہی ابرار احمد کا شکار بن گئے۔
اس کے بعد کپتان شائے ہوپ نے اننگز سنبھالی۔ انہوں نے پہلے شرفین ردرفورڈ (15) کے ساتھ 45 رنز جوڑے اور پھر راسٹن چیز (36) کے ساتھ 64 رنز کی شراکت قائم کی۔ 42ویں اوور میں 184 پر چھ وکٹیں گرنے کے بعد میچ پاکستان کے حق میں جاتا دکھائی دے رہا تھا، لیکن ہوپ اور جسٹن گریوز نے ساتویں وکٹ کے لیے 110 رنز کی ناقابل شکست شراکت بنا کر میچ کا نقشہ بدل دیا۔
شائے ہوپ نے شاندار بیٹنگ کرتے ہوئے 94 گیندوں پر 120 رنز کی ناقابل شکست اننگز کھیلی، جس میں 10 چوکے اور 5 چھکے شامل تھے، جبکہ گریوز نے صرف 24 گیندوں پر 43 ناٹ آؤٹ رنز بنائے۔ ویسٹ انڈیز نے مقررہ 50 اوورز میں 6 وکٹوں پر 294 رنز بنائے۔
ہدف کے تعاقب میں پاکستان کی بیٹنگ لائن مکمل طور پر ناکام رہی۔ صرف سلمان علی آغا (30) اور محمد نواز (23*) ہی کچھ مزاحمت کر سکے، باقی کوئی بھی بیٹسمین ڈبل فگر میں داخل نہ ہو سکا۔ پوری ٹیم 29.2 اوورز میں صرف 92 رنز پر ڈھیر ہو گئی۔
ویسٹ انڈیز کے فاسٹ بولر جیدن سیلز نے تباہ کن بولنگ کرتے ہوئے 7.2 اوورز میں صرف 18 رنز دے کر 6 وکٹیں حاصل کیں۔ ان کا ساتھ گڈاکیش موتی (2 وکٹ) اور راسٹن چیز (1 وکٹ) نے دیا۔ پاکستان کی جانب سے ابرار احمد اور نسیم شاہ نے دو دو وکٹیں حاصل کیں، جبکہ محمد نواز اور صائم ایوب نے ایک ایک کھلاڑی کو آؤٹ کیا۔
سیریز کا آغاز پاکستان نے پہلے ون ڈے میں 5 وکٹوں سے کامیابی کے ساتھ کیا تھا، لیکن ویسٹ انڈیز نے دوسرا میچ بھی 5 وکٹوں سے جیت کر مقابلہ برابر کر دیا۔ اس سے قبل پاکستان ٹی ٹوئنٹی سیریز 1-2 سے جیت چکا تھا۔ تاہم، فیصلہ کن ون ڈے مکمل طور پر میزبان ٹیم کے نام رہا، جس میں شائے ہوپ کی شاندار بیٹنگ اور جیدن سیلز کی تباہ کن بولنگ نے تاریخی فتح کو ممکن بنایا۔
جیدن سیلز کو شاندار بولنگ پر میچ کا بہترین کھلاڑی قرار دیا گیا، جبکہ شائے ہوپ کی مسلسل شاندار بیٹنگ نے انہیں ویسٹ انڈیز کی بیٹنگ لائن اپ کا مرکزی ستون ثابت کر دیا۔
