ویسٹ انڈیز نے بارش سے متاثرہ دوسرے ون ڈے میں پاکستان کو پانچ وکٹوں سے شکست دے کر تین میچوں کی سیریز ایک، ایک سے برابر کر دی۔

(ویب ڈیسک)؛ اتوار کو ٹراؤبا میں پاکستان اور ویسٹ انڈیز کے درمیان دوسرا ون ڈے میچ مسلسل بارش کے باعث کئی بار رکاوٹ کا شکار ہوا، جس کے بعد میچ کو 35، 35 اوورز تک محدود کر دیا گیا۔ میزبان ٹیم نے بہتر حالات کا فائدہ اٹھاتے ہوئے نظرثانی شدہ ہدف 181 رنز 10 گیندیں باقی رہتے حاصل کر کے کامیابی اپنے نام کی۔

اس سے قبل برائن لارا کرکٹ اکیڈمی میں بارش کے باعث پاکستان کی اننگز 37 اوورز میں 171 رنز سات کھلاڑی آؤٹ پر محدود ہو گئی۔ پہلے بیٹنگ کرتے ہوئے اوپنرز صائم ایوب اور عبداللہ شفیق نے 37 رنز کا آغاز فراہم کیا، تاہم نویں اوور میں صائم ایوب 23 رنز بنا کر آؤٹ ہو گئے۔ جے ڈن سیلز نے اگلی ہی کامیابی میں کپتان بابر اعظم کو تین گیندوں پر صفر پر بولڈ کر کے بڑا دھچکا پہنچایا۔

عبداللہ شفیق اور محمد رضوان نے 27 رنز کی شراکت قائم کی لیکن شفیق 26 رنز پر پویلین لوٹ گئے۔ رضوان 16 رنز بنا کر ایل بی ڈبلیو آؤٹ ہوئے، جس کے بعد حسین طلعت نے 31 رنز کی اننگز سے کچھ مزاحمت کی۔ حسن نواز نے شاندار بیٹنگ کرتے ہوئے ناقابلِ شکست 36 رنز بنائے، جس میں تین چھکے شامل تھے، جبکہ شاہین آفریدی 11 رنز پر ناٹ آؤٹ رہے۔

ویسٹ انڈیز کی جانب سے جے ڈن سیلز نے شاندار بولنگ کرتے ہوئے 23 رنز دے کر تین وکٹیں حاصل کیں، جبکہ جیڈیا بلیڈز، شمر جوزف، گڈاکیش موتی اور راسٹن چیز نے ایک، ایک وکٹ لی۔ جواب میں ویسٹ انڈیز نے ہدف کا کامیاب تعاقب کرتے ہوئے پانچ وکٹوں سے فتح سمیٹی اور سیریز فیصلہ کن میچ تک پہنچا دی۔